jan pi weka tan ma tomo Omela

ilo lili li kalama li tawa e waso. tenpo musi pi seli suli li kama tawa ma tomo Omela lon poka pi telo suli. tomo lon telo li kule mute. lon nasin lon poka pi tomo pi sinpin kule, lon poka pi ma kasi suli, lon anpa pi kasi suli, lon poka pi tomo kulupu, la jan musi li tawa. jan mute li pona lukin: jan suli li kepeken len suli pi loje pimeja. mama li awen e jan lili ona li tawa lon nasin. nasin ante la kalama musi li wawa li suwi. jan li tawa musi. jan lili li tawa li mu sama waso lon sewi. jan ale li tawa poka wan pi ma tomo. ona la ma kasi telo li lon. ma kasi telo la jan lili li lon soweli tawa. linja pi kule musi li lon linja soweli. ona li mu tawa ona sama. ona li pilin pona: soweli ale la soweli ni taso li kama pilin e tenpo musi. weka mute la nena suli li lon sike pi ma tomo Omela. kon pi tenpo suno sin li pona. ni la ale li ken lukin e sewi pi nena suli e lete lon ona. kon tawa li kalama e len musi. kalama ala li lon ma kasi laso la jan li ken kute e kalama musi tan jan musi kama. ona li awen tawa li kama tawa ma kasi. kon li suwi tan ni ale.

pona! kepeken seme la mi ken toki e pilin pona? nimi seme li toki e jan pi ma tomo Omela?

ona li pilin pona sama ala jan lili, taso ona li pilin pona kin. pilin pona li sin ala tawa kulupu ni. sina kama sona e ni la sina ken pilin e ijo pi nasin ona. ken la sina lukin tawa jan lawa lon poka pi jan utala. ken la ona li lon tomo tawa kepeken jan wawa anpa. taso jan lawa li lon ala. jan li kepeken ala ilo utala li anpa ala e jan ni. kulupu ni li ike ala. mi sona ala e nasin lawa kulupu, taso pilin mi la ona li mute ala.

sama jan lawa sama nasin ike la ona li kepeken ala nasin mani li kepeken ala jan utala li kepeken ala ilo pi pakala seli. taso mi toki sin e ni: ona li anpa ala li sona lili ala. ona li sona sama mi ale.

ike la mi ale li kepeken nasin pakala: pilin mi li tan jan sona ike li toki e ni: "pilin pona li sona ala. pilin ike taso li tan sona." ni li pakala pi jan musi. ona li wile ala toki e ike pi nasin ike e ike pi pilin ike. ona la ijo li ike e pilin sina la o pali sin e ona. taso mi toki e ijo pona pi pilin ike la mi ike e pilin pona. mi toki e pona pi nasin utala la mi weka e ante pona ale. mi ale li pakala: mi kama ken ala toki e jan pi pilin pona. mi kama ken ala toki pona e pilin pona.

kepeken seme la mi ken toki e jan pi ma tomo Omela? ona li jan lili ala, taso jan lili ona li pilin pona kin. jan suli ona li sona mute li wile pona li lon pona. pona a! mi wile toki pi pona mute e ona. mi wile toki e lon ona tawa sina. toki mi la ma tomo Omela li sama lipu musi pi jan lili li lon ala. ken la sina wile sitelen insa e wile sina. mi ken ala sona e wile pi sina ale! nanpa wan la ilo seme li lon? pilin mi la tomo tawa li lon ala nasin pi poka tomo. ni li tan pilin pona pi kulupu Omela. pilin pona li tan sona ni: seme li wile suli pi kulupu pona? seme li wile ala li ike ala? seme li ike? kulupu nanpa tu la ijo mute li ken. ilo pi telo len en ilo seli en wawa pona en tomo tawa linja en ilo suno sewi en ilo pona pi jaki ale li ken. ona li ken lon ala kin. ni li suli ala. sina wile la ona li lon.

pilin mi la jan mute li tawa ma tomo Omela tan ma ante lon tenpo musi kepeken tomo tawa linja. pilin mi la tomo tawa linja li wawa mute li pona mute lukin.

kepeken ijo ale ni kin la mi pilin e ni: ken la ona li pona ala tawa sina li sama lawa ike. pilin pona en kalama en musi en soweli li lon? musi ala. ni li lon tawa sina la unpa suli li ken. unpa li pona e pilin sina la o pilin monsuta ala; ona li lon. taso, pona la tomo sewi pi jan unpa sewi li lon ala. ni li pilin pini mi kin, taso lon la tomo pi jan sewi li ike. nasin sewi li lon. jan sewi li lon ala. jan unpa li ken lon ma pi wile ona li ken pana e ona sama tawa jan wile ale. ona li ken lon kulupu musi. kalama musi pi wile unpa o kama. ale o olin o awen e jan tan tenpo ni. mi sona e ni: pilin ike anpa li lon ala kulupu Omela.

taso, ijo ante seme li lon? tenpo pini la mi pilin e ni: moku nasa li lon ala. taso tenpo ni la mi kama sona e ike pi pilin ni. jan li wile e ona la moku nasa li suwi e kon li pona e sijelo li kama e sona ale li awen lon tenpo suli li pona nanpa wan li ike ala e nasin sijelo. tawa jan ante la telo pi nasa lili li lon.

ijo ante seme a li lon ma tomo pona? pilin pi nanpa wan. pilin pona pi awen lon. taso sama jan sewi la jan utala li lon ala. pilin pona tan moli li ike li ken ala awen. pilin pona suli li tan ala utala li tan wan pi jan ale li tan pona ale. pilin ni li lon pilin jan lon ma tomo Omela. ona li pilin pona tan lon tan ale. pilin mi la jan mute li wile ala e moku nasa.

jan mute li kama lon ma kasi telo lon tenpo ni. kon li pona tan tomo kule pi jan moku. jan lili lili li moku li nasa suwi e sinpin ona. moku lili li lon linja sinpin pi mije suli. jan lili li kama lon soweli tawa li tawa open pi nasin musi. meli suli li pana e kasi. mije suli mute li kepeken kasi lon linja lawa ona.

jan lili pi sike luka luka li awen lon poka kulupu li wan taso li kalama musi kepeken palisa kasi. jan li awen li kute, taso ona li toki ala tan ni: jan lili li pini ala li lukin ala e jan ante. lawa ona li lon kalama musi taso.

ona li pini li anpa e luka ona.

tenpo sama la ilo li kalama suli lon open pi nasin musi a. ona li suli li monsuta li wawa. soweli li pilin monsuta. soweli pi mute lili li mu kin. jan ona li luka e soweli li awen e ona li toki e ni: "ale li pona, olin mi o..." ona ale li kama wan lon open nasin. lukin la jan mute lon poka nasin li sama ma kasi suli. tenpo musi pi seli suli li kama.

sina pilin ala pilin e toki? sina pilin ala pilin e musi e ma tomo e pilin pona? ala? ni la mi toki e ijo ante wan.

tomo lon anpa ma pi tomo kulupu pona la tomo li lon. lupa pini wan en lupa lukin ala li lon. suno lili li kama tan pakala pi lupa pini tan lupa pi tomo ante. poka wan tomo la palisa li lon. kon ona li jaki. palisa li ken weka e jaki tan tomo. poka palisa la poki telo li lon. tomo ni li lili mute. lon tomo ni la jan lili li awen. ona li ken mije li ken meli. lukin la ona li suli pi sike luka wan, taso ona li suli pi sike luka tu tu a. lawa ona li pakala. ken la ni li tan mama. ken la ni li kama tan monsuta, tan moku ala, tan awen ala. ona li pilin e nena ona e sijelo ona. ona li awen lon poka pi weka tan palisa. ona li pilin monsuta tan palisa ike. ona li pini e oko, taso ona li awen sona e ni: palisa li awen lon; lupa li awen pini; jan ala li kama. lupa li awen pini; jan ala li kama, taso tenpo pi mute lili la lupa li kalama li open; jan wan—anu jan mute—li lon. jan wan li ken kama li utala e jan lili. jan ante li awen weka li lukin taso e ona. poki moku en poki telo li kama sin. lupa li pini. lukin li weka. jan lon lupa li toki ala, taso tenpo pi pini mute la jan lili li lon ma ante. ni la ona li sona e suno e toki e mama ona. ona li ken toki. ona li toki e ni: "mi kama pona. o poki ala e mi. mi kama pona a!" jan ante li toki ala. tenpo pini la jan lili li kalama suli lon tenpo pimeja, taso tenpo ni la ona li kalama lili taso sama "m-mu" li kama toki lili. sijelo ona li lili li wawa ala. ona li moku e lili lon tenpo ale. ona li len ala. monsi ona li jaki tan ni: ona li awen lon jaki ona lon tenpo ale.

jan ale li sona e lon ona. jan ale pi kulupu Omela li sona. jan pi mute lili li tawa ona li lukin e ona; jan ante li sona taso e lon ona. ale li sona e wile pi lon ona. jan mute li sona e tan. jan mute li sona ala. taso jan ale li sona e ni: pilin pona, en ma tomo pona, en jan pona kulupu, en jan lili kulupu, en sona kulupu, en kasi moku kulupu, en sewi pona kin li wile e pilin ike ale pi jan lili ni.

jan li kama suli li ken sona e lon la jan suli li toki e ona. jan lili mute li lukin e jan lili anpa. taso tenpo pi mute lili la jan suli li kama kin, anu kama sin, li lukin e ona. tenpo ale la jan ni li pilin ike tan lukin. ona li pilin pakala li pilin jaki li pilin monsuta. ona li wile pali e ijo tawa jan lili. taso ona li ken ala. jan lili li tawa ma suno tan tomo ike li kama sin, li moku, li awen, la pona ona li lon. taso ni li kama la tenpo sama la pona ale li pakala li weka. ni li nasin lawa. jan li weka e pona ale pi kulupu Omela tawa ijo pona lili wan la pilin ike anpa li lon kulupu. ni li ken ala.

nasin lawa li wawa ale. jan li ken ala toki tawa jan lili.

tenpo mute la jan li tawa tomo ona li pilin ike mute. ona li lukin e jan lili e sona pi ijo ante tu. ona li ken awen pilin lon tenpo suno mute, lon tenpo sike mute. taso tenpo suli la ona li kama sona e ni: jan lili li ken ala kepeken pona. ona li ken pilin pona lili tan seli tan moku, taso ona li ken ala pilin mute. ona li kama pakala li ken ala sona e pilin pona lon. ona li awen monsuta la ona li ken ala kama monsuta ala. kin la tenpo kama la jan lili anpa li pakala tan weka poki, tan weka pimeja, tan weka jaki. jan li kama pilin ike ala li kama sona e nasin pona ike li pilin e lon ona. taso pilin ike jan, en pilin wile pona ona, en sona kama ona, li kama e pilin pona lon kulupu. pilin ona li sama ala jan lili li sama ala sona ala. jan li sona e ni: sama jan lili anpa la ona li pona ala. ona li sona e pilin. lon pi jan lili, en sona pi lon ona, li ken e pona pi tomo kulupu e sewi pi kalama musi e sona wawa kulupu. tan jan lili wan la jan li pona tawa jan lili ante. ona li sona e ni: jan lili ni li pilin ike ala lon tomo pimeja lete ona la jan lili ante li ken ala kalama musi tawa jan lon soweli lon tenpo musi pi seli suli.

tenpo ni la sina pilin ala pilin e ona? ona li ken anu seme? taso ijo wan li awen. ona li nasa mute.

tenpo pi mute lili la jan lili wan li lukin e jan lili li kama sin ala tawa tomo ona. tenpo pi mute lili lili la jan suli li toki ala li tawa tan tomo kin. jan ni li tawa nasin li tawa lon nasin lon ala poka pi jan ante. ona li awen tawa li tawa weka tan ma tomo Omela. ona li awen tawa. jan ale li tawa lon poka pi jan ala. tenpo pimeja li kama. jan tawa li wile tawa lon nasin pi ma tomo lili, lon poka pi tomo pi lupa jelo suno, tawa ma suli pimeja. wan la ona li tawa nena suli. ona li awen. ona li weka tan ma tomo Omela li tawa pimeja li kama sin ala. sona pi mi ale la ma wile ona li ken ala. mi ken ala toki e ona. taso lukin la ona li sona e wile tawa ona. jan pi weka tan ma tomo Omela li sona.