toki Vor dem Gesetz li tan jan Franz Kafka. jan mute ante li toki pona e ona.
sinpin pi tomo lawa (tan soweli nata)
sinpin pi tomo lawa la jan li awen e lupa. tawa jan lupa ni la jan li kama tan ma li toki e wile kama pi tomo lawa. taso jan lupa li toki e ni: ona li ken ala kama lon tenpo ni. jan ma li toki e wile sona ni: ona li ken ala ken lon tenpo kama? jan lupa li toki. “ni li ken. taso tenpo ni la ala.” lupa lawa li awen open lon tenpo ale. jan lupa li awen lon poka ona. ni la jan ma li kama anpa lili li lukin e insa. lukin ni la jan lupa li mu musi li toki e ni: “sina wile la o lukin tawa lon utala pi lawa mi. taso o sona e ni: mi wawa. taso jan lupa ale la mi anpa. tomo ale la jan li awen e lupa. jan lupa ale li wawa suli tawa jan lupa pini. jan nanpa tu wan li ike suli la mi a li ken ala lukin.” ike ni li nasa tawa jan ma. ona li pilin e ni: lawa o ken tawa jan ale lon tenpo ale. taso ona li lukin wawa e jan lupa e len seli ona e nena pi lawa ona e linja sinpin ona wawa suli pimeja la ona li kama wile awen tawa tenpo pi ken kama. jan lupa li pana e supa monsi lon poka lupa tawa jan ma. jan ma li kama awen lon sike suno mute lon sike ma mute. tenpo mute la ona li lukin kama. alasa ona li kama e wile lape lon jan lupa. tenpo mute la jan lupa li toki e wile sona. ona li toki e ma mama pi jan ma e ijo ante mute. taso wile sona li lon ala pilin lon. pini toki la ona li toki sin e ni: jan ma li ken ala kama lon tenpo ni. jan ma li jo e ijo mute lon tenpo tawa li kepeken ona ale li kepeken ona pi mani suli kin li lukin esun e kama ona tawa jan pi awen lupa. jan lupa li kama jo e ijo ale. taso ona li toki e ni: “mi kama jo tan wile ni taso: pilin sina la sina weka ala e pali suli.” tenpo sike mute ni la jan ma li lukin e jan lupa lon tenpo ale. jan lupa ante li kama weka tan sona ona. pilin ona la jan ni taso li pakala e kama ona pi tawa lawa. jan ma li toki utala e ike ona. tenpo open la ona li kalama li wawa. ona li kama suli la ona li mu taso tawa ona sama. ona li kama sama jan lili. kin la tan tenpo lukin suli la ona li kama sona e pipi lili kin lon len pi jan lupa. ona li toki e wile kama tawa pipi kin. pini la lukin ona li kama ike. ona li sona ala e ni: lon la ma li kama ala kama pimeja mute? taso pimeja la ona li kama sona e suno awen pi lupa lawa. jan ma li awen ala lon tenpo kama. poka pi moli ona la sona ale pi lon ona li kama wan lon lawa li kama wile sona. ona li toki ala e wile sona ni tawa jan lupa lon tenpo pini. jan ma li ken ala sinpin e sijelo ona la ona li tawa e luka tawa jan lupa. jan lupa li wile tawa anpa suli tan ni: tenpo la suli pi jan tu li kama ante mute. ona li toki. “sina wile e seme lon tenpo ni? wile sina li pini ala.” jan ma li toki. “jan ale li wile lon lawa. tan seme la sike ma ale ni la mi taso li lukin kama?” jan lupa li sona e moli kama pi jan ma li kalama suli tawa kute pakala ona. “jan ante li ken ala kama tan ni: lupa ni li tawa sina taso. tenpo ni la mi pini e ona.”
tan jan Tepo
nasin lawa li lon kulupu. jan wan li wile kepeken ni li tawa suli tan ma weka ona tawa lawa. nasin tawa la lupa li lon. jan li awen e lupa. jan pi ma weka li toki e wile ona tawa jan awen. taso jan awen li toki e ni: jan ma li ken ala tawa lon lupa lon tenpo ni. jan ma li toki insa lili li kama toki e ni: ona li ken ala ken tawa lon tenpo kama? jan awen li toki. “ken. taso tenpo lon la ala.” lon la lupa nasin li open lon tenpo ale. jan awen li lon poka ona li pini ala e nasin. ni la jan ma li lukin lili e insa lupa. jan awen li lukin e ni li mu tan pilin musi li toki e ni: “wile sina li wawa la, sina ken lukin awen tawa. taso o sona e ni: mi wawa. kin la lupa ante mute en jan awen ante mute li lon kama lon nasin. jan awen ale la jan awen kama li wawa suli. jan awen nanpa tu wan a li wawa sewi a. mi a li wile ala a lukin a e ona.” ni li nasa lili tawa jan ma. pilin ona la jan ale o ken kepeken lawa lon tenpo wile ale. taso ona li lukin sin e jan awen. len pi jan awen li sama selo pi soweli suli, nena ona li suli, linja suli li lon uta ona li pimeja. jan ma li kama pilin e ni: ona li wile awen, li wile tawa lon tenpo ni taso: jan awen li ken e ni. jan awen li pana e supa lon poka lupa li toki e ni: o awen lon ni. supa la jan ma li awen lon tenpo suno mute li kama awen lon tenpo sike mute. tenpo mute la ona li lukin toki tawa jan awen li lukin kama ken tawa. jan awen li kama pilin ike lili tan toki mute ni. tenpo mute la jan awen li toki lili tawa jan ma, li wile sona e ijo lili mute, e ijo pi ma ona, e ijo pi tomo ona, e ijo ante mute. taso jan awen li toki e wile sona sama ni: sona ni li suli ala tawa ona. tenpo ale la wile sona li pini la jan awen li toki e ni: jan ma li awen ken ala tawa. jan ma li tawa suli la ona li jo e ilo tawa e ijo ante mute. ona li kama pana e ijo ale ni tawa jan awen tan ni: pana la ken la jan awen li kama wile ken e jan ma. taso jan awen li kama jo e ijo ale la ona li toki e ni taso: “mi kama jo e ijo ni tan ni taso: sina o pilin ala e ni: sina kepeken ken ale ala sina.” lon tenpo sike mute ni la jan ma li alasa e nasin tawa jan awen ni lon tenpo ale. jan awen ante li kama weka tan pilin ona. pilin la jan ni taso li pakala e nasin li ken ala e ni: ona li ken kepeken lawa. tenpo mute la ona li pilin ike tan weka ken, li toki e ni kepeken kalama suli. tenpo li weka la ona li kama majuna la toki pi pilin ike li awen li kama kalama lili. pipi lili li lon len ona, tenpo li suli la ona li kama sona mute e pipi ni, la ona li toki wawa e wile ona tawa pipi a: pipi o, o ante e pilin pi jan awen. majuna la lukin ona li kama pakala. ale li kama pimeja lukin, taso ona li sona ala e ni: ni li lon anu tan ike lukin. taso pimeja li lon la lukin la suno a li tan lupa. tenpo ni la tenpo moli li lon poka. ona li lukin sin e tenpo pini ale ona li kama sona e ni: sona wan la ona li toki ala e wile sona ni tawa jan awen. ona li ken ala tawa mute e sijelo la ona li tawa e luka la jan awen li kama lon poka. jan awen li wile kute la ona o anpa e sijelo ona tan ni: jan ma kin la sijelo li kama anpa mute. jan awen li toki. “sina wile sona e seme a lon tenpo ni? wile sona sina li pini ala.” jan ma li toki. “jan ale li alasa e lawa. ni la tenpo sike mute a li weka la tan seme la jan ante ala a li kama lon lupa ni li wile tawa insa?” jan awen li sona e ni: jan ma li kama moli. kute pi jan ma li kama ike la jan awen li kalama suli e ni: “jan ante ala a li ken kama tan ni: lupa ni li kama lon tawa sina taso. tenpo ni la mi pini e lupa.”
jan li wile tawa insa (tan jan Ke Tami)
tomo li lon. insa ona la jan pi nasin lawa li toki e pali jan ike e pali jan pona. jan utala li lon lupa tomo li lawa e tawa jan lon lupa ni. tenpo wan la jan li kama tan ma li kama tawa tomo nasin. jan li wile tawa insa tomo. taso jan utala li toki: »mi ken ala e sina tawa insa lon tenpo ni.« jan wile li awen e toki ni lon insa pi lawa ona. ni la ona li toki: »mi ken ala ken tawa insa lon tenpo kama?«
jan pi lupa tomo li toki: »ni li ken. taso tenpo ni la ni li ken ala.«
lupa li awen open li ken e tawa. ijo ala li ike e tawa. kin la jan pi ken utala li tawa poka lupa. ni la jan wile li anpa sinpin e sijelo ona li wile lukin e insa. jan pi poka lupa li lukin e pali ni la ona li kalama e pilin musi ona li toki:
»wile sina li wawa la o lukin tawa insa. sina pilin ike ala kin tawa toki mi pi ken ala la o lukin tawa. taso o sona: mi wawa suli. o sona kin: mi jan open taso pi wawa open taso. jan utala mute li lon insa pi tomo nasin. lupa ale la jan ni wan li lukin e tawa jan. jan nanpa wan li ken anpa e mi. jan nanpa tu li ken anpa e jan nanpa wan. jan ante li ken anpa e ona. sina awen tawa la wawa pi jan utala li awen kama suli. mi lukin taso e jan nanpa tu wan la mi wile tawa.«
ike ni ale li sin nasa tawa jan pi wile insa; pilin ona la jan ale o ken tawa nasin lawa. taso ona li awen lukin e jan utala e len ona pi awen seli e nena suli lon sinpin ona e linja sinpin suli pimeja tu lon anpa nena. pini la jan wile li kama wile awen tawa tenpo ken tan toki pi jan wawa ni. jan wawa suli li pana e supa awen tawa ona li ken e jan wile tawa poka lupa.
tenpo suno mute en tenpo mute pi sike mun en tenpo mute pi sike suno la jan wile li awen. tenpo mute la ona li toki e wile ona tawa jan pi poka lupa li pana e pini lape tan toki ni. tenpo mute la jan utala lupa li toki tawa jan pi wile ken li wile e toki tan sona jan. taso toki ni li suli ala li tan ala wile sona li sama toki pi jan lawa. pini pi ale ni la jan lupa li awen kama toki: »sina ken ala tawa insa.« jan li tawa suli tan ma tawa tomo nasin ni la ona li jo e ijo mute tan wile tawa. ona li wile kepeken ijo ni ale tawa toki ken pi jan wawa. jan wawa lupa li kama jo e ijo ni ale tan jan pana, taso ona li toki e ni taso:
»mi jo e ijo sina tan ni taso: sina o pilin ala ike tan pali ala.«
tenpo sike ale la jan awen wile li awen lukin e jan awen lupa. jan lupa ante pi insa tomo li kama weka tan sona ona. lukin ona la, jan lupa ni taso li ike e ken tawa ona. tenpo open la ona li mu wawa ike mute e ike ni kepeken ala nasin pona. tenpo sike li tenpo e jan mu la ona li kama mu pi wawa lili taso. nasin toki ona li kama sama nasin toki pi jan lili. pipi lili li lon len pi jan wawa la ona li kama sona e pipi kin lon tenpo awen. ona li toki e wile tawa pipi kin la pipi o ante e toki pi jan wawa. tenpo pini la oko ona li kama wawa ala. ma ale li kama ala kama pimeja? ona li sona ala e lon ni tan pakala oko. taso na li kama lukin e suno lili tan lupa tomo. tenpo ni la tenpo moli ona li kama.
poka pi moli ona la jan li wan e ale pi tenpo ona lon insa pi lawa ona. ni la wile wan li kama lon ona li wile sona e ijo tan jan utala. tenpo pini la jan li toki ala e wile sona ni. wawa li weka tan jan wile. ona li ken ala tawa sewi tan supa. ni la ona li tawa e luka li kama e jan pi poka luka kepeken ni. tenpo li lili e jan wile la jan utala li kama wile anpa e sijelo ona tawa jan lili.
jan suli li toki: »sina awen wile. ni la sina wile sona e seme?«
jan lili li toki: »jan ale li wile e nasin lawa. tan seme la jan ala li kama. tan seme la jan ala li wile tawa insa tomo pi nasin lawa lon tenpo ale a?«
jan lupa li kama sona e ni: jan pi poka moli li kama kute ike. ni la ona li kalama wawa:
»jan ante ala li ken tawa insa lon ni. lupa ni li tawa sina taso. tenpo ni la mi tawa. tenpo ni la mi pini e lupa.«